Criwiau'n parhau ar safle tân mawr mewn iard sgrap

Y tânKate Moore

Cafodd criwiau eu galw i'r digwyddiad yn Sir y Fflint

Roedd 75 o weithwyr y gwasanaeth tân yn ceisio diffodd fflamau mewn iard sgrap yn y gogledd ddwyrain dros y penwythnos.

Dywedodd Gwasanaeth Tân ac Achub Gogledd Cymru fod criwiau wedi cael eu galw i'r digwyddiad yn Nhalacre yn Sir y Fflint ddydd Sul.

Mae pump o beiriannau tân yn parhau i geisio diffodd y tân fore Llun, ac mae'r gwasanaeth yn parhau i annog pobl i osgoi'r ardal a chadw'r ffyrdd yn glir er mwyn caniatáu i gerbydau brys gael mynediad.

Maen nhw hefyd yn gofyn i unrhyw un sy'n gallu gweld neu arogli mwg gadw ffenestri a drysau ar gau, a diffodd unrhyw systemau aerdymheru neu awyru sy'n tynnu aer i mewn i eiddo.

Dywedodd Jody McEachern o'r Gwasanaeth Tân: "Er eich diogelwch, os gwelwch yn dda 'newch chi osgoi'r ardal a chadwch y ffyrdd yn glir i alluogi cerbydau brys i gael mynediad.

"Os gallwch weld neu arogli mwg, cadwch eich ffenestri a'ch drysau ar gau a diffoddwch unrhyw systemau aerdymheru neu awyru sy'n tynnu aer i mewn i'ch eiddo."

Mae Cyfoeth Naturiol Cymru (CNC) wedi dweud bod swyddogion wedi bod ar safle'r "tân mawr" ers dydd Sul ac yn parhau i fonitro'r sefyllfa er mwyn helpu i leihau unrhyw effeithiau ar yr amgylchedd.

Yn gynharach, dywedodd CNC fod y "dŵr sy'n yn cael ei ddefnyddio i daclo'r tân yn cael ei gyfyngu i'r safle er mwyn amddiffyn yr Afon Dyfrdwy".

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.