لائیو, اسحاق ڈار کی عباس عراقچی سے ملاقات: علاقائی امن کے لیے تعاون جاری رکھنے اور اسلام آباد مفاہمت کو آگے بڑھانے پر اتفاق

لائیو کوریج

1. 35 منٹ قبلمقبوضہ مغربی کنارے کے علاقے نابلس میں جھڑپیں، چار فلسطینی اور ایک اسرائیلی ہلاک

   مقبوضہ مغربی کنارے میں نابلس کے جنوب مغرب میں واقع گاؤں تل کے قریب جمعے کو ہونے والی جھڑپوں میں چار فلسطینی اور ایک اسرائیلی ہلاک ہوگیا، جبکہ جھڑپوں کے آغاز کے بارے میں فلسطینی اور اسرائیلی مؤقف ایک دوسرے سے مختلف ہیں۔

   فلسطینی وزارتِ صحت نے کہا کہ چاروں فلسطینی اسرائیلی فوج کی فائرنگ سے ہلاک ہوئے، جبکہ چار دیگر زخمی ہوئے جن میں سے تین کی حالت تشویشناک ہے۔

   وزارت کے مطابق یہ واقعہ اس وقت پیش آیا جب گاؤں کے رہائشیوں نے آبادکاروں کے حملے کا مقابلہ کیا۔

   وزارت نے ایک مختصر بیان میں کہا کہ آبادکاروں نے تل میں فلسطینی گھروں پر حملہ کیا اور ان پر براہِ راست گولیاں چلائیں۔ طبی ذرائع کے مطابق ہلاکتوں میں مزید اضافے کا خدشہ ہے۔

   دوسری جانب، اسرائیلی امدادی سروسز نے بتایا کہ تل گاؤں اور حفات گلعاد نامی اسرائیلی بستی کے قریب ہونے والی جھڑپوں میں ایک اسرائیلی ہلاک ہوگیا۔

   ایک فلسطینی عینی شاہد نے بی بی سی کو بتایا کہ گاؤں کے رہائشی تقریباً 30 آبادکاروں کا مقابلہ کرنے گئے تھے جو علاقے میں فلسطینی گھروں پر حملے کر رہے تھے۔

   اس کے برعکس، اسرائیلی فوج کا کہنا ہے کہ چند اسرائیلی شہری پیدل چل رہے تھے جن پر حملہ کیا گیا، جس کے بعد فوج نے ان کے دفاع کے لیے مداخلت کی۔

   اسرائیلی اخبار ’یسرائیل ہیوم‘ نے اسرائیلی موقف نقل کرتے ہوئے دعویٰ کیا کہ ایک فلسطینی نے ایک بستی کے سکیورٹی اہلکار سے اسلحہ چھین لیا اور اسرائیلیوں پر فائرنگ کی۔

   بی بی سی کے لیے جھڑپوں کے آغاز کے حوالے سے دونوں موقف کی آزادانہ طور پر تصدیق کرنا ممکن نہیں ہو سکا۔

2. ایک گھنٹہ قبلاسحاق ڈار کی عباس عراقچی سے ملاقات: علاقائی امن کے لیے تعاون جاری رکھنے اور اسلام آباد مفاہمت کو آگے بڑھانے پر زور

   

   ،تصویر کا ذریعہGetty Images

   پاکستان کے نائب وزیراعظم اور وزیر خارجہ سینیٹر محمد اسحاق ڈار نے شنگھائی تعاون تنظیم کے وزرائے خارجہ کے اجلاس کے موقع پر ایران کے وزیر خارجہ سید عباس عراقچی سے ملاقات کی۔

   ملاقات کے دوران دونوں رہنماؤں نے پاکستان اور ایران کے درمیان قریبی اور دیرینہ تعلقات کا اعادہ کیا اور خطے کی موجودہ صورتحال پر تبادلہ خیال کیا۔

   اسحاق ڈار نے حالیہ علاقائی کشیدگی پر گہری تشویش کا اظہار کرتے ہوئے پائیدار امن اور استحکام کے لیے مذاکرات، تحمل، کشیدگی میں کمی اور مسلسل سفارتی رابطوں کی اہمیت پر زور دیا۔

   انھوں نے جون 2026 میں اسلام آباد میں طے پانے والی مفاہمتی یادداشت (ایم او یو) کے تحت حاصل ہونے والی پیش رفت کو آگے بڑھانے کی ضرورت پر بھی زور دیا۔

   ایرانی وزیر خارجہ سید عباس عراقچی نے علاقائی امن اور سلامتی کے فروغ کے لیے پاکستان کی مسلسل سفارتی حمایت اور تعمیری کردار کو سراہا۔

   انھوں نے ایرانی ماہی گیروں اور عملے کے ارکان کی محفوظ واپسی میں پاکستان کے تعاون پر بھی شکریہ ادا کیا، جن میں وہ افراد بھی شامل تھے جو امریکی حکام کی جانب سے روکے گئے جہازوں پر سوار تھے۔

   عراقچی نے ایرانی، امریکی اور دیگر متعلقہ حکام کے ساتھ پاکستان کی قریبی رابطہ کاری کو بھی سراہا، جس کے ذریعے ان افراد کی پاکستان سے محفوظ آمدورفت اور ایران واپسی کو یقینی بنایا گیا۔

   دونوں فریقوں نے باہمی دلچسپی کے امور پر قریبی رابطے اور باقاعدہ مشاورت جاری رکھنے پر اتفاق کیا اور علاقائی امن، استحکام اور مشترکہ خوشحالی کے لیے مل کر کام کرنے کے عزم کا اعادہ کیا۔

3. ایک گھنٹہ قبلفی الحال تیل کی مصنوعات کی فراہمی میں کمی کا مسئلہ نہیں: یورپی یونین آئل کوآرڈینیشن گروپ

   

   ،تصویر کا ذریعہGetty Images

   یورپی یونین کے آئل کوآرڈینیشن گروپ نے جمعے کو کہا کہ مشرقِ وسطیٰ میں جنگ کے باعث توانائی کی منڈی پر دباؤ کے باوجود فی الحال خام تیل اور ریفائن شدہ تیل کی مصنوعات کی فراہمی میں کسی کمی کا مسئلہ نظر نہیں آ رہا۔

   یہ مشاورتی گروپ، جس میں یورپی یونین کے رکن ممالک کے نمائندے شامل ہیں، تیل کے ذخائر اور سپلائی نیٹ ورک کی سلامتی کی نگرانی کرتا ہے اور بحران کے وقت مختلف ممالک کے اقدامات اور ردِعمل میں ہم آہنگی پیدا کرتا ہے۔

   موجودہ صورتحال میں تیل کی عالمی منڈی کا جائزہ لینے کے لیے یورپی یونین کے آئل کوآرڈینیشن گروپ کا اجلاس جمعرات کو منعقد ہوا تھا۔

   گروپ نے اپنے بیان میں تصدیق کی کہ ’اس وقت فراہمی کا کوئی مسئلہ موجود نہیں ہے۔ یورپ میں خام تیل اور تیل کی مصنوعات کی طلب گوداموں اور تجارتی ذخائر کے ساتھ ساتھ بین الاقوامی منڈیوں میں موجود دیگر ذرائع (خلیج فارس کے علاقے کے علاوہ) سے پوری کی جا سکتی ہے۔‘

   تاہم، اس مشاورتی گروپ نے خبردار کیا کہ ’مشرقِ وسطیٰ میں جنگ کا دورانیہ آنے والے ہفتوں اور مہینوں میں بڑا اثر ڈال سکتا ہے اور منڈی میں قلت پیدا ہونے کا سبب بن سکتا ہے۔‘

   برینٹ خام تیل کی قیمت گذشتہ روز ایک ماہ سے زیادہ عرصے میں پہلی بار 100 ڈالر فی بیرل سے اوپر پہنچ گئی تھی، تاہم آج اس میں کمی دیکھی گئی ہے اور ابتدائی کاروباری لین دین کے دوران تقریباً 4 فیصد کمی کے بعد یہ تقریباً 96 ڈالر فی بیرل تک آ گئی ہے۔

4. 2 گھنٹے قبلپاسدارانِ انقلاب کا بحرین میں ایمازون ڈیٹا سینٹر تباہ کرنے کا دعویٰ

   ایران کی پاسداران انقلاب فورس کا کہنا ہے کہ اس نے بحرین میں ایمازون کے ڈیٹا سینٹر کو ’تباہ‘ کر دیا ہے۔

   آئی آر جی سی کے بیان میں کہا گیا ہے کہ اس کی فورسز نے ’آپریشن نصر 2 کی 27ویں لہر میں، امریکی کمپنی ایمازون کے ڈیٹا سینٹر کے خلاف اپنے سابقہ ​​آپریشن کو مکمل کرتے ہوئے مرکز کی بقیہ عمارت کو نشانہ بنایا اور تباہ کر دیا۔‘

   بحرینی حکام نے ابھی تک اس معاملے پر کوئی تبصرہ نہیں کیا ہے۔

   آئی آر جی سی نے پہلے 21 جولائی کو کہا تھا کہ اس نے ’بحرین میں امریکی کمپنی ایمازون کے مرکزی ڈیٹا انفراسٹرکچر کو کئی کروز میزائلوں سے نشانہ بنایا ہے۔‘

   پاسداران انقلاب کے مطابق اس مرکز پر حملہ درخوین جوہری تنصیب پر امریکی حملے کے جواب میں کیا گیا۔

5. 2 گھنٹے قبلامریکہ نے اپنے 60 تجارتی شراکت داروں پر نئے ٹیرف نافذ کر دیے

   

   ،تصویر کا ذریعہGetty Images

   امریکہ نے اپنے 60 تجارتی شراکت داروں پر نئے ٹیرف نافذ کر دیے ہیں۔ ٹرمپ انتظامیہ کی جانب سے جاری تجارتی جنگ میں جن ممالک اور علاقوں کو نشانہ بنایا گیا ہے، جن میں برطانیہ، چین اور یورپی یونین شامل ہیں۔

   ان کی تمام اشیا پر 10 فیصد سے 12.5 فیصد تک ٹیرف عائد ہوگا۔ یہ تقریباً تمام امریکی درآمدات کا احاطہ کرتا ہے۔

   یہ ٹیرف جمعے کو ختم ہونے والے اسی نوعیت کے ایک سابقہ محصول کی جگہ لے رہے ہیں اور ان کی بنیاد اس دعوے پر ہے کہ اہم معاشی شراکت دار جبری مشقت کے مسئلے سے مناسب طور پر نمٹنے میں ناکام رہے ہیں۔

   لیکن امریکی تجارتی ماہر کیرولین فرائنڈ نے کہا کہ یہ اقدام ’جبری مشقت کے بارے میں نہیں ہے‘ بلکہ ٹرمپ صرف ’ٹیرف نافذ کرنے کے لیے ایک قانونی وجہ تلاش کر رہے ہیں۔‘

   امریکی سپریم کورٹ نے اس سال کے آغاز میں فیصلہ دیا تھا کہ ہنگامی اختیارات کے تحت دنیا بھر میں عائد کیے گئے کئی ٹیرف غیر قانونی طور پر نافذ کیے گئے تھے۔

   درآمدات پر 10 فیصد سے 12.5 فیصد تک ڈیوٹی گزشتہ ماہ وائٹ ہاؤس نے تجویز کی تھی، کیونکہ اس کے مطابق متعلقہ ممالک جبری مشقت سے نمٹنے کے لیے کافی اقدامات نہیں کر رہے تھے۔

   امریکی تجارتی نمائندے جیمیسن گریر نے کہا ’آج کا اقدام ایک ایسے مسئلے کو درست کرنے کا آغاز کرے گا جو انسانی حقوق کی خلاف ورزی بھی ہے اور تجارت کو بگاڑنے والا عمل بھی، تاکہ ہر جگہ مزدوروں کی فلاح و بہبود بہتر ہو۔‘

   انھوں نے مزید کہا کہ نئی ڈیوٹیاں امریکہ کے 60 بڑے تجارتی شراکت داروں پر لاگو ہوں گی، جو امریکی درآمدات کے 99.4 فیصد حصے کا احاطہ کرتے ہیں۔

   یو سی سان ڈیاگو سکول آف گلوبل پالیسی اینڈ اسٹریٹجی کی ڈین، فرائنڈ نے بی بی سی کے ٹوڈے پروگرام کو بتایا کہ نئے ٹیرف جمعہ کو ختم ہونے والے نظام کے بدلے میں ہیں۔

   جب ان سے جبری مشقت کی وجہ کے بارے میں پوچھا گیا تو انھوں نے کہا ’میرا خیال ہے کہ وہ ٹیرف نافذ کرنے کے لیے ایک قانونی وجہ تلاش کر رہے تھے تاکہ انھیں برقرار رکھا جا سکے، کیونکہ ان کے مقاصد اس بارے میں بالکل واضح رہے ہیں‘۔

   ہنرچ فاؤنڈیشن کی تجارتی پالیسی کی ماہر ڈیبورا ایلمز نے کہا کہ نئے محصولات ظاہر کرتے ہیں کہ ٹرمپ انتظامیہ اپنی ٹیرف حکمت عملی کو آگے بڑھانے کے لیے ’پُرعزم‘ ہے۔

   انھوں نے بی بی سی کو بتایا کہ جن ممالک پر یہ ٹیرف لگائے گئے ہیں، ان کے لیے یہ ثابت کرنا مشکل ہوگا کہ انھوں نے جبری مشقت سے وابستہ درآمدات کو روکنے کے لیے کافی اقدامات کیے ہیں۔

   ایشیا سوسائٹی پالیسی انسٹی ٹیوٹ کی اقتصادی سلامتی کی ماہر وینڈی کٹلر نے کہا کہ ان محصولات کے نتیجے میں کاروباروں اور صارفین کے اخراجات بڑھنے کا امکان ہے، اگرچہ مستثنیٰ قرار دی گئی متعدد اشیا کی وجہ سے اس کے اثرات کسی حد تک کم ہو سکتے ہیں۔

   انھوں نے مزید کہا کہ زیادہ تر تجارتی شراکت دار نئے محصولات سے مایوس ہوں گے اور ممکنہ طور پر دوسرے ممالک کے ساتھ معاہدے کرکے ’امریکہ پر اپنا انحصار کم کرنے‘ کے طریقوں پر توجہ دیں گے۔

6. 2 گھنٹے قبلبراہ راست امریکی مداخلت نے آبنائے ہرمز کی سلامتی کو خطرے میں ڈالا: عباس عراقچی

   

   ،تصویر کا ذریعہGetty Images

   ایران کے وزیر خارجہ عباس عراقچی نے کرغزستان میں شنگھائی تعاون تنظیم (SCO) کے سربراہی اجلاس میں کہا کہ ایسے میں جب اسلام آباد کی مفاہمت کی یادداشت پر دستخط ہوئے چند ہفتے ہی گزرے ہیں، امریکہ نے ایرانی انفراسٹرکچر پر حملہ کرکے یہ ظاہر کیا ہے کہ وہ اپنے وعدوں پر عمل نہیں کر رہا ہے۔

   انھوں نے یہ بھی کہا کہ ’آبنائے ہرمز میں سیکورٹی اور بحری انتظامات کو نافذ کرنے کے عمل میں امریکہ کی براہ راست مداخلت اور بحری ناکہ بندی کے دوبارہ نفاذ نے ایک بار پھر دنیا کے اہم ترین اسٹریٹجک آبی گزرگاہوں میں سے ایک کی سلامتی کو خطرے میں ڈال دیا ہے اور بین الاقوامی تجارتی جہاز رانی کے معمول کے بہاؤ میں خلل ڈالا ہے۔‘

   اجلاس میں اپنی تقریر کے ایک اور حصے میں، ایرانی وزیر خارجہ نے مزید کہا کہ اس ملک پر کسی بھی حملے میں ملوث فریقوں کی ’بین الاقوامی ذمہ داری‘ کا سامنا کرنا پڑے گا۔

   انھوں نے اس بات پر زور دیا کہ ایران، ’جائز دفاع کے حق کے فریم ورک کے اندر، اس ملک کے خلاف کسی بھی جارحیت کی اصل کو اپنی مسلح افواج کے جائز ہدف کے طور پر سمجھے گا۔‘

7. 3 گھنٹے قبلآبنائے ہرمز سے ٹینکر کی آمدورفت کم ترین سطح پر پہنچ گئی

   خبر رساں ادارے رؤٹرز نے اطلاع دی ہے کہ آبنائے ہرمز سے گزرنے والے آئل ٹینکرز کی تعداد کل ایک رہ گئی، جو کہ جہاز سے باخبر رہنے کے اعداد و شمار کے مطابق دو ماہ سے زیادہ عرصے میں سب سے کم تعداد ہے۔

   یہ کمی اس وقت آئی ہے جب خطے کے پانیوں میں جہاز رانی کے خطرات نے تیل کی قیمتوں کو تقریباً 100 ڈالر فی بیرل تک دھکیل دیا ہے۔

   میرین انٹیلی جنس کمپنی کیپلر کے ڈیٹا سے پتہ چلتا ہے کہ 23 ​​جولائی کو صرف ایک آئل ٹینکر آبنائے ہرمز سے گزرا تھا۔

   بدھ 22 جولائی کو وہاں سے گزرنے والے جہازوں کی تعداد بھی تین بتائی گئی۔

8. 3 گھنٹے قبلخیبر پختونخوا میں 19 جولائی سے بارشوں اور سیلاب کے باعث 28 افراد ہلاک ہوئے ہیں: پی ڈی ایم اے

   

   ،تصویر کا ذریعہAFP via Getty Images

   پاکستان کے صوبہ خیبر پختونخوا میں قدرتی آفات سے نمٹنے کے ادارے پی ڈی ایم اے کا کہنا ہے کہ 19 جولائی سے اب تک صوبے میں تیز بارشوں اور فلیش فلڈ سے جڑے واقعات میں 28 افراد ہلاک جبکہ 29 زخمی ہو چکے ہیں۔

   پی ڈی ایم اے کی جانب سے جاری بیان میں بتایا گیا ہے کہ مرنے والوں میں 10 مرد, 15 بچے اور تین خواتین شامل ہیں۔

   بیان کے مطابق تیز بارشوں اور فلیش فلڈ کے باعث مجموعی طور پر 47 گھروں کو نقصان پہنچا جس میں سے 10 گھر مکمل طور پر منہدم ہو گئے۔

   پی ڈی ایم اے کا کہنا ہے کہ یہ حادثات پشاور، نوشہرہ، خیبر، مردان، بونیر، باجوڑ، شانگلہ، صوابی، چترال، دیر، ایبٹ آباد، مانسہرہ، ہری پور، کوہستان اپر، ٹانک، تور غر اور کرم اور شمالی و جنوبی وزیرستان میں پیش آئے۔

   ادارے نے عوام سے اپیل کی ہے کہ بلا وجہ سفر سے گریز کریں، حساس سیاحتی مقامات کا رخ نہ کریں اور حکومتی اداروں کی جانب سے الرٹس پر عمل کریں۔

9. 4 گھنٹے قبلبلوچستان میں سیشن جج عبدالحکیم کاکڑ کے قتل کے خلاف ہڑتال:’میرے فیصلوں میں آپ کو ہمیشہ قانون کی بالادستی کی پاسداری نظر آئے گی‘

   

   پاکستان کے صوبہ بلوچستان کے ضلع مستونگ میں نامعلوم مسلح افراد کے حملے میں سیشن جج عبدالحکیم کاکڑ اور ان کے گن مین کی ہلاکت اور ایڈیشنل سیشن جج طارق لاشاری کے زخمی ہونے کے خلاف کوئٹہ سمیت بلوچستان بھر میں وکلا کی جانب سے ہڑتال کی جا رہی ہے۔

   ہڑتال کے باعث کوئٹہ سمیت بلوچستان کے دیگر شہروں میں وکلا بطور احتجاج عدالتوں میں پیش نہیں ہوئے جس کی وجہ سے عدالتوں کی کاروائی متائثر ہوئی۔

   وکلا نے اس واقعے کے خلاف سوگ منایا اور عدالتوں میں سیاہ پرچم بھی لگائے جبکہ سینیچر کے روز بھی ہڑتال کی کال دی گئی ہے۔

   ’میرے فیصلوں میں آپ کو ہمیشہ قانون کی بالادستی اور انصاف کے اعلیٰ تقاضوں کی پاسداری نظر آئے گی‘

   بلوچ یکجہتی کمیٹی کی سربراہ ڈاکٹر ماہ رنگ بلوچ کی بہن نادیہ بلوچ ایڈووکیٹ نے سیشن جج مستونگ کے قتل پر افسوس کا اظہار کرتے ہوئے کہا کہ انھیں ڈاکٹر ماہ رنگ اور بی وائی سی کے دیگر رہنماؤں کے خلاف مقدمات کے حوالے سے متعدد بار مستونگ میں عبدالحکیم کاکڑ کی عدالت میں پیش ہونے کا موقع ملا۔

   انھوں نے کہا کہ بہت سی باتیں ایسی تھیں جو وہ عبدالحمید کاکڑ کی زندگی میں نہیں کہہ سکیں۔

   نادیہ بلوچ کا کہنا ہے کہ ’میں پورے یقین سے کہہ سکتی ہوں کہ عبدالحکیم کاکڑ ایک نہایت دیانت دار، اصول پسند اور باوقار جج تھے۔ً

   ان کا کہنا تھا کہ ڈاکثر ڈاکٹر ماہ رنگ بلوچ کے مقدمات کی قانونی نوعیت پر بحث کے دوران کاکڑ کہا کرتے تھے کہ ’حالات جس نہج پر بھی ہوں، میرے فیصلوں میں آپ کو ہمیشہ قانون کی بالادستی اور انصاف کے اعلیٰ تقاضوں کی پاسداری نظر آئے گی۔‘

   نادیہ بلوچ کے مطابق عبدالحکیم کاکڑ نے ڈاکٹر ماہ رنگ بلوچ اور بی وائی سی کی رہنما گلزادی بلوچ کی تین مقدمات میں ضمانت منظور کی جبکہ دونوں پیروں سے معذور بیبرگ بلوچ کو ایک ایف آئی آر میں ضمانت کے مرحلے پر ہی مقدمے سے بری کر دیا۔

   ان کے بقول عبدالحکیم کاکڑ کے فیصلوں سے واضح تھا کہ وہ دباؤ سے بالاتر ہو کر قانون اور انصاف کے تقاضوں کے مطابق فیصلے کرنے پر یقین رکھتے تھے۔

   نادیہ بلوچ نے کہا جب انھوں نے عبدالحکیم کاکڑ کے قتل کی خبر دیکھی تو انھیں احساس ہوا کہ صرف ایک انسان کو نہیں مارا گیا بلکہ یہ انصاف پر بھی حملہ ہے کیونکہ وہ قانون کی حکمرانی، انصاف، آئینی حقوق اور عوام کے وقار پر یقین رکھتے تھے۔

   

10. 5 گھنٹے قبلایران کی زیباکنار میں پاسدارانِ انقلاب کی بحریہ کے ہیڈکوارٹر پر امریکی حملے کی تصدیق

    ایران کے صوبے گیلان کے گورنر کے سیاسی نائب علی باقری کا کہنا ہے کہ امریکہ نے زیباکنار میں پاسدارانِ انقلاب کی بحریہ کے ہیڈکوارٹر پر حملہ کیا ہے۔

    انھوں نے بتایا کہ اس حملے میں ہیڈکوارٹر کے بعض آلات اور ساز و سامان کو نقصان پہنچا ہے۔

    علی باقری کے مطابق ابتدائی تحقیقات سے ظاہر ہوتا ہے کہ اس حملے کے نتیجے میں تاحال کسی جانی نقصان کی اطلاع نہیں ملی۔

11. 6 گھنٹے قبللیفٹیننٹ جنرل عامر رضا کی فور سٹار جنرل کے عہدے پر ترقی، کمانڈر نیشنل سٹریٹیجک کمانڈ مقرر

    

    ،تصویر کا ذریعہPM Office

    پاکستان فوج کے لیفٹیننٹ جنرل عامر رضا کو کمانڈر نیشنل سٹریٹیجک کمانڈ مقرر کر دیا گیا۔

    وزیرِ اعظم کے دفتر سے جاری ایک بیان میں کہا گیا ہے کہ وزیرِ اعظم محمد شہباز شریف نے پاکستان آرمی کے چیف آف جنرل سٹاف لیفٹیننٹ جنرل عامر رضا کو فور سٹار جنرل کے عہدے پر ترقی دیتے ہوئے انھیں کمانڈر نیشنل سٹریٹیجک کمانڈ مقرر کر دیا ہے۔

    بیان میں کہا گیا ہے کہ وزیرِ اعظم نے جنرل عامر رضا کو ترقی اور نئی تقرری پر مبارک باد دیتے ہوئے اس اہم ذمہ داری کی انجام دہی کے لیے نیک خواہشات کا اظہار کیا۔

    کمانڈر آف نیشنل سٹریٹجک کمانڈ کا عہدہ

    یاد رہے کہ گذشتہ برس 27ویں آئینی ترمیم کی منظوری کے بعد آرمی ایکٹ کے تحت چیئرمین جوائنٹ چیفس آف سٹاف کمیٹی کا عہدہ ختم کر کے اس کے بجائے کمانڈر آف نیشنل سٹریٹجک کمانڈ کا عہدہ متعارف کروایا گیا۔

    آرمی ایکٹ میں ترمیم کے مطابق اس عہدے پر چیف آف ڈیفینس فورسز کی سفارش پر وزیر اعظم پاکستانی بری فوج کے ایک جنرل کو تین سال کے لیے تعینات کریں گے۔

    ترمیم کے تحت قومی مفاد میں وزیر اعظم کمانڈر آف نیشنل سٹریٹجک کمانڈ کی مدت ملازمت آرمی چیف کی سفارش پر مزید تین سال کے لیے بڑھا بھی سکتے ہیں اور اس فیصلے کو عدالت میں چیلنج نہیں کی جا سکے گا۔

    اس کے علاوہ اس عہدے پر تعینات فوجی جنرل پر آرمی ایکٹ کے تحت ریٹائرمنٹ کی عمر اور دیگر ضوابط لاگو نہیں ہوں گے۔

12. 6 گھنٹے قبلعالمی منڈی میں تیل کی قیمت 100 ڈالر سے تجاوز کر گئی

    

    ،تصویر کا ذریعہGetty Images

    ایران اور امریکہ کے درمیان جاری کشیدگی اور خطے میں امریکی اہداف پر ایرانی حملوں کے نتیجے میں عالمی منڈی میں تیل کی قیمتوں میں مزید اضافہ دیکھنے میں آیا ہے۔

    بی بی سی فارسی کے مطابق جمعے کی صبح ایشیائی منڈیوں میں برینٹ نارتھ خام تیل کی قیمت 100 ڈالر فی بیرل سے تجاوز کرنے کے بعد 101 ڈالر فی بیرل تک پہنچ گئی۔

    اسی دوران ابوظہبی کے مربان خام تیل کی قیمت بھی اضافہ دیکھنے میں آیا۔ جمعے کہ صبح مربان خام تیل کی قیمت 107.20 ڈالر فی بیرل ہو گئی۔

    تجزیہ کاروں کے مطابق مشرقِ وسطیٰ میں بڑھتی ہوئی کشیدگی اور توانائی کی رسد سے متعلق خدشات کے باعث عالمی تیل منڈیوں میں قیمتوں پر دباؤ بڑھا ہے۔

13. 6 گھنٹے قبلبحرین میں خطرے کے سائرن اور دھماکے کی آوازیں

    بحرین کی وزارتِ داخلہ کا کہنا ہے کہ جمعے کی صبح ملک بھر میں خطرے کے سائرن بجائے گئے تھے۔

    وزارت داخلہ کی جانب سے ایکس پر جاری ایک پیغام میں کہا گیا ہے کہ ’خطرے کا سائرن بجا دیا گیا ہے۔ تمام شہریوں اور رہائشیوں سے درخواست ہے کہ پُرسکون رہیں اور قریب ترین محفوظ مقام پر چلے جائیں۔‘

    بین الاقوامی خبر رساں ادارے اے ایف پی کے ایک نامہ نگار نے بھی دھماکے کی آواز سننے کی خبر دی ہے۔

    اس سے قبل ایرانی فوج نے دعویٰ کیا تھا کہ اس نے خودکش ڈرونز کے ذریعے بحرین میں واقع شیخ عیسیٰ اڈے پر امریکی فوج کی تنصیبات کو نشانہ بنایا ہے۔

14. 7 گھنٹے قبلایرانی فوج کا بحرین اور اردن میں امریکی فوجی تنصیبات پر ڈرون حملوں کا دعویٰ

    

    ،تصویر کا ذریعہNurPhoto via Getty Images

    ایرانی فوج نے ’آپریشن تھنڈر‘ کے 24ویں مرحلے کے تحت جمعے کی صبح بحرین اور اردن میں امریکی فوجی تنصیبات کو نشانہ بنانے کا دعویٰ کیا ہے۔

    ایرانی خبر رساں ادارے ارنا کے مطابق، ایرانی فوج کا کہنا ہے کہ اس نے خودکش ڈرونز کے ذریعے بحرین میں واقع شیخ عیسیٰ اڈے پر امریکی فوج کی تنصیبات کو نشانہ بنایا ہے۔ ایرانی فوج کے مطابق ان حملوں میں ایندھن کے ذخائر، فوجی ساز و سامان کے گودام، ذخیرہ کرنے کی شیڈز اور امریکی فوجیوں کی رہائشی تنصیبات کو ہدف بنایا گیا۔

    ایرانی فوج کا مزید کہنا ہے کہ اس نے ڈرونز کے ذریعے اردن کے الازرق اڈے پر امریکی فوج کے زیر استعمال طیاروں کے ہینگرز، طیاروں کی دیکھ بھال کے مراکز اور فوجیوں کی رہائش کے لیے استعمال ہونے والی تنصیبات کو نشانہ بنایا ہے۔

    بیان میں مزید کہا گیا ہے کہ ایران کے جائز اور قانونی مفادات کے خلاف کسی بھی اقدام کے نتیجے میں خطے کے دیگر ممالک کے سلامتی اور معاشی مفادات متاثر ہوں گے۔

15. 7 گھنٹے قبلکسی ملک کے منجمد اثاثوں کو ہرجانے کی ادائیگیوں کے لیے استعمال کرنے سے خطرناک نظیر قائم ہو گی: ایران

    ایران کے وزیر خارجہ عباس عراقچی کا کہنا ہے کہ کسی بھی ملک کے اثاثے منجمد کر کے انھیں مستقبل میں کیے جانے والے غیر متعلقہ دعووں کی ادائیگی کے لیے استعمال کرنے سے ایک خطرناک نظیر قائم ہو گی۔

    یاد رہے کہ امریکی صدر نے ٹروتھ سوشل پر جاری ایک بیان میں کہا تھا کہ آج کے بعد سے جہازوں، ان کے سامانِ تجارت (کارگو) یا اس سے متعلق کسی بھی چیز کو پہنچنے والے تمام نقصانات کا معاوضہ ایران کے ان فنڈز سے ادا کیا جائے گا جو امریکہ کے قبضے اور کنٹرول میں ہیں۔ ان کا کہنا تھا کہ یہ ہرجانے بہت زیادہ بھی ہو سکتے ہیں لیکن ان کے خیال میں یہی صحیح قدم ہے۔

    بی بی سی فارسی کے مطابق امریکی صدر کے بیان پر ردِ عمل دیتے ہوئے عباس عراقچی کا کہنا ہے کہ جو لوگ ان اقدامات کا خیر مقدم کر رہے ہیں یا اس سے فائدہ اٹھانے کے متعلق سوچ رہے ہیں، انھیں یاد رکھنا چاہیے کہ جب حکومتیں دوسروں کی ملکیت ضبط کرنے کو معمول کا عمل بنا لیں تو پھر کوئی بھی جائیداد محفوظ نہیں رہے گی۔

16. 8 گھنٹے قبلحکومت نے پیٹرول اور ڈیزل کی قیمتوں میں ایک بار پھر اضافہ کر دیا

    

    ،تصویر کا ذریعہAFP via Getty Images

    آئل اینڈ گیس ریگولیٹری اتھارٹی (اوگرا) نے پیٹرول اور ڈیزل کی قیمتوں میں بالترتیب چار روپے 40 پیسے اور تین روپے 62 پیسے فی لیٹر اضافہ کر دیا ہے۔

    پیٹرولیم ڈویژن کی جانب سے جاری اعلامیے کے مطابق ہائی سپیڈ ڈیزل کی قیمت تین روپے 62 پیسے فی لٹر اضافے کے بعد 378 روپے 66 پیسے فی لیٹر تک پہنچ گئی ہے جبکہ پیٹرول کی قیمت 4 روپے 40 پیسے فی لیٹر اضافے کے بعد نئی قیمت 331 روپے 52 پیسے فی لیٹر ہو گئی ہے۔

    خیال رہے کہ کچھ برس پہلے تک پاکستان کی حکومت ماہانہ کی بنیاد پر تیل کی قیمتوں کا تعین کرتی تھی، اس کے بعد یہ عمل 15 روز اور پھر سات روز پر منتقل کر دیا گیا اور گذشتہ ہفتے حکومت نے پیٹرولیم مصنوعات کا تعین روزانہ کی بنیاد پر کیا جائے گا۔

    سوموار کے روز سے پیٹرولیم مصنوعات کی قیمتوں کے روزانہ کی بنیاد پر تعین کے آغاز کے بعد سے اب تک ڈیزل کی قیمت میں 50 روپے سے زائد جبکہ پیٹرول کی قیمت میں تقریباً 16 روپے کا اضافہ ہو چکا ہے۔

17. 8 گھنٹے قبلپاکستان کے لیے خطرہ بننے والے شدت پسندوں کے ڈھانچے جہاں کہیں بھی ہوں، ختم کر دیے جائیں گے: فیلڈ مارشل عاصم منیر

    

    ،تصویر کا ذریعہX/RadioPakistan

    پاکستان کے آرمی چیف فیلڈ مارشل عاصم منیر نے اس عزہ کا اعادہ کیا ہے کہ پاکستان کے لیے خطرہ بننے والے شدت پسندوں کے ڈھانچے جہاں کہیں بھی ہوں، انھیں ختم کر دیا جائے گا۔

    سرکاری خبر رساں ادارے اے پی پی نے پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان کا حوالہ دیتے ہوئے بتایا کہ فیلڈ مارشل عاصم منیر نے یہ بات جنرل ہیڈکوارٹرز راولپنڈی میں 20 ویں نیشنل ورکشاپ بلوچستان کے شرکا سے ملاقات کے دوران کہی۔

    آئی ایس پی آر کی جانب سے جاری بیان کے مطابق فیلڈ مارشل عاصم منیر کا کہنا ہے کہ سکیورٹی فورسز اور قانون نافذ کرنے والے ادارے عوام کی حمایت کے ساتھ بلوچستان میں دیرپا امن کے قیام کو یقینی بنائیں گے۔

    انھوں نے اس عزم کا بھی اعادہ کیا کہ دہشت گردی کے مکمل خاتمے تک شدت پسندوں اور ان کے سہولت کاروں کے خلاف کارروائیاں جاری رہیں گی۔

    آئی ایس پی آر کے مطابق فیلڈ مارشل نے اس بات کا بھی اعادہ کیا کہ جہاں کہیں بھی دہشت گردوں کا بنیادی ڈھانچہ ملک اور اس کے عوام کے لیے خطرہ بنے گا، پاکستان اسے ختم کرنے کے لیے اپنے پختہ عزم پر قائم رہے گا۔

    آرمی چیف نے الزام لگایا کہ بیرونی سرپرستی میں کام کرنے والے عناصر مسلسل بلوچستان میں تشدد کو ہوا دینے، استحکام کو نقصان پہنچانے اور امن کو سبوتاژ کرنے کی کوشش کرتے رہے ہیں۔ تاہم ان کا کہنا تھا کہ پاکستان کی مسلح افواج عوام کی حمایت کے ساتھ ان مذموم عزائم کو مضبوط اور فیصلہ کن جواب دے کر ناکام بنائیں گی۔

18. 9 گھنٹے قبلاب سے کسی بھی جہاز کو ہونے والے نقصان کا ہرجانہ ایرانی اثاثوں سے ادا کیا جائے گا: صدر ٹرمپ

    

    ،تصویر کا ذریعہGetty Images

    امریکی صدر ڈونلڈ ٹرمپ نے اعلان کیا ہے کہ اب سے کسی بھی جہاز پر حملے کی صورت میں ہونے والے نقصان کا کا ہرجانہ ایرانی اثاثوں سے ادا کیا جائے گا۔

    اپنی سوشل میڈیا سائٹ ٹروتھ سوشل پر جاری ایک بیان میں امریکی صدر کا کہنا ہے کہ آج کے بعد سے جہازوں، ان کے سامانِ تجارت (کارگو) یا اس سے متعلق کسی بھی چیز کو پہنچنے والے تمام نقصانات کا معاوضہ ایران کے ان فنڈز سے ادا کیا جائے گا جو امریکہ کے قبضے اور کنٹرول میں ہیں۔ان کا کہنا ہے کہ اس فیصلے کا اطلاق آئندہ اطلاع تک ہو گا۔

    صدر ٹرمپ کا کہنا ہے کہ یہ ہرجانے بہت زیادہ بھی ہو سکتے ہیں لیکن میرے خیال میں یہی صحیح قدم ہے۔

19. 24 جولائی 2026امریکی حملوں میں کم از کم چار افراد ہلاک، سات زخمی

    جمعہ کے روز امریکی فوج کی جانب سے ایران کے مختلف حصوں پر مسلسل 13ویں رات حملوں کے نتیجے میں کم از کم چار افراد ہلاک اور سات زخمی ہو گئے ہیں۔

    بی بی سی فارسی کے مطابق جمعہ کی صبح امریکی فوج کی مرکزی کمان سینٹکام کی جانب سے امریکی فضائی حملوں کے اختتام کے اعلان کے کچھ دیر بعد جنوبی ایرانی شہر اہواز کے حکام نے بتایا کہ ان حملوں میں چار افراد ہلاک جبکہ پانچ دیگر زخمی ہوئے ہیں۔

    دوسری جانب ایرانی سرکاری خبر رساں ادارے ارنا کے مطابق بندر عباس شہر پر امریکی میزائل حملوں کے نتیجے میں دو افراد زخمی ہوئے ہیں۔

    صوبۂ ہرمزگان کی ہلالِ احمر سوسائٹی کے سربراہ کے مطابق یہ دونوں افراد ’تپہ اللہ اکبر‘ نامی علاقے میں ہونے والے حملوں کے نتیجے میں زخمی ہوئے ہیں جنھیں ہسپتال منتقل کر دیا گیا ہے۔

    اس سے قبل ایران کی وزارتِ صحت کے اطلاعاتی مرکز کے سربراہ حسین کرمان پور نے جمعرات کو بتایا تھا کہ امریکی فضائی حملوں کے دوبارہ آغاز کے بعد سے 55 افراد ہلاک جبکہ 629 افراد زخمی ہو چکے ہیں۔

20. 24 جولائی 2026امریکی فوج کا مسلسل 13ویں رات ایران پر حملہ

    

    ،تصویر کا ذریعہUS Centcom

    امریکی فوج کی مرکزی کمان (سینٹکام) کا کہنا ہے کہ اس نے مسلسل 13ویں رات ایران پر حملے کیے ہیں۔

    سینٹکام کی جانب سے جاری بیان میں دعویٰ کیا گیا ہے کہ ان حملوں میں ایرانی فوج کے کمانڈ مراکز، ڈرون ذخیرہ کرنے کی تنصیبات، مواصلاتی نیٹ ورکس، ساحلی نگرانی کی تنصیبات اور ایرانی بحری صلاحیتوں کو نشانہ بنایا گیا۔ امریکی فوج کے مطابق ان حملوں کا مقصد آبنائے ہرمز سے گزرنے والے جہازوں کے لیے ایران سے لاحق خطرے کو مزید کم کرنا ہے۔

    سینٹکام کا دعویٰ ہے کہ پاسدارانِ انقلاب کی حالیہ کارروائیوں کے باوجود آبنائے ہرمز جہاز رانی کے لیے کھلی ہوئی ہے اور امریکی فوج کی معاونت کے ساتھ تجارتی جہاز بدستور آبنائے ہرمز سے آزادانہ طور پر گزر رہے ہیں۔

    بی بی سی فارسی کے مطابق جمعہ کی صبح ایران کے جن علاقوں سے دھماکوں اور فضائی حملوں کی اطلاعات موصول ہوئی ہیں ان میں بندر عباس، اہواز، امیدیہ، جاسک، قشم، اندیمشک، خرم آباد، خنداب، بروجرد، فیروزآباد، تفت اور نائین شامل ہیں۔

    اس کے علاوہ مشرقی تہران سے فضائی دفاعی کارروائیوں کی بھی متعدد اطلاعات موصول ہوئیں۔