PFIPC: Ụlọomeiwu Nnọchiteanya agwala Ribadu, Ojukwu ka ha bịa zara ọnụ ha

Kọmitii nchereoge nke Ụlọomeiwu Nnọchiteanya hiwere iji nyochaa ngalaba Presidential Foreign Investment Promotion Council (PFIPC) akpọọla oku ka Onye Ndụmọdụ Nchekwa Naịjirịa bụ Nuhu Ribadu bịa nye nkọwa gbasara ihe ụlọọrụ ya ma gbasara ngalaba ahụ a sị bụ adịgboroja.

A sị ya gbaa mbọ pụta n'ihu kọmitii ahụ n'ụbọchị Tọzde 23 Julaị 2026, ngwangwa ọ kụrụ elekere iri na abụọ nke etiti ụbọchị iji kọwaa ihe ndị ụlọọrụ ya merela kemgbe ha chọpụtara na ọ bụghị gọọmenti etiti hiwere ngalaba PFIPC.

Kọmitii ahụ kpọkwara oku ka Minista na-ahụ maka mmekọrịta mba ofesi bụ Bianca Odumegwu-Ojukwu jiri ụkwụ ya bịa zaa oku ahụ.

Nke a bụ otu akụkụ nnyocha Ụlọomeiwu Nnọchiteanya na-eme iji chọpụta etu PFIPC jiri rụọ ọrụ dịka ngalaba gọọmenti n'agbanyeghị na o nweghị iwu kwadoro ha.

Ha na-enyochakwa ihe mere ngalaba ahụ jiri gosipụta onwe ya dịka ụlọọrụ gọọmenti, gbakọọrọ ngalaba gọọmenti ndị ọzọ aka ma gbaakwa mbọ izute ndị mba ofesi na-etinye ego site n'iji aha obi ọchịchị Naịjirịa.

E nyekwara kọmitii ahụ ikike ịchọpụta etu ngalaba ahụ a sị na ọ bụ adịgboroja siri keta oke n'atụmatụ mkpata na mmefu ego nke afọ 2026.

Ụlọọrụ ICPC agbaala Gbajabiamila ajụjụ banyere ụlọọrụ PFIPC

Ụlọọrụ na-ebuagha megide nrụrụaka na Naịjirịa bụ ICPC ekwuola na ha agbara onyeisi ọrụ n'obi ọchịchị Naịjirịa bụ Femi Gbajabiamila ajụjụ ọnụ gbasara esemokwu metụtara ụlọọrụ Presidential Foreign Investment Promotion Council (PFIPC) nke e kwuru na ọ bụ nke adịgboroja.

ICPC kwuru na ọ bịara n'ụlọọrụ ha dịka ha zigara ya akwụkwọ oku, zaa ajụjụ ndị nnyocha, wee laghachi n'ọrụ ya. Ha gbakwunyere na ejideghị ya.

Ụlọọrụ ahụ gara n'ihu kwuo na nnyocha ahụ so n'iwu Onyeisiala Bola Tinubu nyere ụlọọrụ ahụ ka o mee nnyocha iji chọpụta etu ụlọọrụ PFIPC nke gọọmenti etiti kwuru na ọ bụghị ụlọọrụ iwu kwadoro ka ọ nọrọ n'ime obi ọchịchị gọọmenti etiti 'Federal Secretariat' dị n'Abuja.

Cheta na onye a na-akpọ Adeniyi Adeyemi, bụ onye kwuru na ya bụ onyeisi ụlọọrụ PFIPC, na-ekwu na ọ bụ Gbajabiamila nyere ya akwụkwọ nhọpụta ọrụ, nke ọ na-ebo ebubo na ya nyere Gbajabiamila ego aka azụ iji nweta ọkwa ahụ.

Chetakwa na Gbajabiamila gọnarịrị ebubo ndị ahụ ma kpụpụ Adeyemi n'ụlọikpe maka nkwutọ aha ya.

Ọzọ bụkwa na ụlọọrụ Onyeisiala Tinubu kwukwara na ụlọọrụ PFIPC abụghị ụlọọrụ gọọmenti.

Ka ọ dị ugbu a, ụlọọrụ ICPC kwuru na nnyocha ahụ ka na-aga n'ihu, mana ha ga-eme ka ọha mara ihe ga-esi na ya pụta.

A nwụchiela Adeniyi Adeyemi maka ebubo ihiwe ụlọọrụ gọọmenti adịgboroja

Ndị ọrụ nchekwa anwụchiela onyeisi ụlọọrụ gọọmenti adịgboroja dịka ụlọikpe nyere iwu ka a nwụchie ya.

Adeniyi Adeyemi onye kpọrọ onwe ya onyeisi ụlọọrụ Presidential Foreign Intervention Promotion Council (PFIPC) abịaghị ụlọikpe nke ugboro abụọ n'ụbọchị Tuzde 14 Julaị, 2026, ọ bụ nke a mere ka Ọkaikpe Moahammed Umar nke Ụlọikpe Ukwu Etiti Naịjirịa dị n'Abuja ji nye iwu ka a nwụchie Adeyemi ebe ọbụla ọ nọ.

Ọ bụ nke a mere ndị ọrụ nchekwa ji kapara ngwangwa ụlọikpe nyere iwu ahụ.

Cheta na gọọmenti boro Adeniyi Adeyemi ebubo ihiwe ụlọọrụ gọọmenti adịgborja a kpọrọ Presidential Foreign Intervention Promotion Council (PFIPC).

Obi ọchịchị Naịjirịa kwuru hoo ha na ụlọọrụ ahụ bụ ụlọọrụ adịgboroja ma kọwaa na enweghị oge ọbụla Onyeisiala Bola Tinubu ji nye Adeyemi ọkwa ọbụla.

Ụlọikpe enyela iwu ka a nwụchie Adeniyi Adeyemi

Ụlọikpe Ukwu Etiti Naịjirịa dị n'Abuja enyela iwu ka a nwụchie Adeniyi Adeyemi maka na ọ bịaghị n'ụlọikpe n'ụbọchị Tuzde 14 Julaị 2026 maka ebubo asatọ gụnyere nrụrụaka na ndị ọzọ e boro ya.

Ọkaikpe Mohammed Umar kpebiri nke a oge a kpọlitere ikpe Adeyemi n'ụlọikpe ma chọpụta na ọ bịaghị ụlọikpe.

Cheta na ndị uweojii kpụpụrụ Adeniyi Adeyemi onye e boro ebubo ihiwe ụlọọrụ gọọmenti adịgborja a kpọrọ Presidential Foreign Intervention Promotion Council (PFIPC), na mmadụ abụọ ọzọ n'ụlọikpe maka ebubo gụnyere nrụrụaka nakwa iji akwụkwọ gọọmenti adịgboroja hiwe ụlọọrụ gọọmenti

Pati ndị anọghị na gọọmentị agbarụọla ihu dịka Tinubu nyere ICPC iwu ka ha nyochaa PFIPC

Otu ndọrọndọrọ ọchịchị na-agba gọọmenti ukwu ajụla atụmatụ Onyeisiala Bola Tinubu nyere ka 'Independent Corrupt Practices and Other Related Offences Commission' (ICPC) nyochaa ebubo metụtara ụlọọrụ a sị na ọ bụ nke adịgboroja a a kpọrọ, 'Presidential Foreign Intervention Promotion Council' (PFIPC).

Nkatọ a sochiri ntuziaka nke Tinubu nyere ICPC ka ha nyochaa ọrụ PFIPC, nke Adeniyi Adeyemi na-edu, ma nyefee mputara ya n'ime ụbọchị iri atọ.

Dịka ozi ọnụ na-ekwuru Onyeisiala bụ Bayo Onanuga, binyere aka si kwuo,nnyocha ahụ ga-elekwasị anya n'ebubo imepụta akwụkwọ adịgboroja, mgbalị ịchọ, akpaego ụlọakụ, azụmahịa ego na ndịọrụ gọọmenti maọbụ ndị ọzọ sonyere.

Ihe pati ndị na anghị n'ọchịchị na-ekwu

Mana Ọnụ na-ekwuru African Democratic Congress (ADC) bụ Bolaji Abdullahi, na onye ndọrọndọrọ ọchịchị Omoyele Sowore nke Africa Action Congress (AAC) kwuru na gọọmenti etiti agaghị enwe ike ime nyocha n'ụzọ ziri ezi n'ihe metụtara ebubo e boro ya.

N'ozi o weputara na ụbọchi Wenezde, Bolaji kwuru na ụlọọrụ Onyeisiala eburula ụzọ kpee ikpe site n'ịkọwa akwụkwọ ndị metụtara okwu ahụ dịka akwụkwọ adịgboroja tupu nyocha amalite.

N'otu aka ahụ, Sowore sikwa na onweghi ntụkwasị obi ebe nyocha ICPC nọ.

Ha abụọ kwuru na naanị kọmitii nọọrọ onwe ha nwere ike ịchọpụta eziokwu ma weghachite ntụkwasị obi ọha.

Ọgbaghara ahụ gbadoro ụkwụ na nkwupụta Adeyemi na-ekwu na a họpụtara ya n'ụzọ iwu kwadoro dịka Onyeisi PFIPC.

Ọ boro Onyeisi ndịọrụ Onyeisiala bụ Femi Gbajabiamila, ebubo iri ngari n'ihi nhọpụta ahụ, ma jụkwa nkwupụta gọọmenti na ụlọọrụ PFIPC adịghị.

Ma ụlọọrụ Onyeisiala kọwara Adeyemi dịka onye aghụghọ, na-ekwu na o mepụtara akwụkwọ nhọpụta adịgboroja jiri ya kpọọ onye ọrụ gọọmenti n'ụlọọrụ na-adịghị adị.

Ka ọ dị ugbu a, e boro Adeyemi na mmadụ abụọ ọzọ ebubo mpụ asatọ n'ụlọikpe, ebe a ga-amalite ikpe ahụ na 27 Julaị.

Cheta n'otu pati Nigeria Democratic Congress, NDC kpọrọ oku ka a chụpụ Gbajabiamila ozugbo, maka ebubo gbasara ya na ụlọọrụ gọọmentị a na-enyo enyo nakwa okwu ịre ọkwa ọrụ gọọmentị.

N'ozi ọnụ na-ekwuru NDC bụ Osa Director wepụtara na Fraịde, abalị atọ nke ọnwa Julaị, otu pati ahụ rịọrọ Onyeisiala Tinubu ka ọ kwụsị Onyeisi Ndị Ọrụ ya n'ọrụ nwa oge, iji nye ohere maka nnyocha doro anya n'ihu n'ebubo ndị ahụ.