BBC News, Somali
U gudub qaybta macluumaadka

You’re viewing a text-only version of this website that uses less data. View the main version of the website including all images and videos.

Take me to the main website

Xuutiyiinta oo sheegay in ay soo rideen daroon lagu sameeyay Turkiga oo Sacuudigu isticmaalayay

Xuutiyiinta Yemen ayaa shalay sheegay inay duqeymo cirka ah la beegsadeen xarumaha Shidaalka ee Aramco iyo halka laga soo saaro Shidaalka Yanbu ee dalka Sacuudiga.

Kooban

  • Warbaahinta kala ah The New York Times, Axios, CNN, iyo Associated Press ayaa soo weriyay in Donald Trump uu go'aansaday inuusan sii xoojin weerarrada milateri ee Mareykanka uu ku hayo Iran, ugu yaraan xilligan la joogo.
  • Dhulgariir cabirkiisu yahay 6.4 oo ku dhuftay Iran.
  • Gaari caddaan ah ayaa fiidnimadii Sabtida abbaaro 10:00 habeenimo (22:00 waqtiga maxalliga ah) lagu dhex waday dad isugu yimid munaasabad ka dhacday Berlin.

Tebin toos ah

  1. Yahuudda la dajiyay Daanta Galbeed ayaa gubay masaajidyo, gawaari iyo beero

    Saraakiil Falastiiniyiin ah ayaa sheegay in Yahuudda la deegaameeyayay dab qabadsiiyeen laba masjid, sidoo kalena ay gubeen baabuur iyo beero ku yaalla Daanta Galbeed ee la haysto, iyadoo xiisadda gobolka ay sii kordhayso.

    Weeraradan ugu dambeeyay ayaa dhacay laba maalmood kaddib markii ay ku dagaallameen Yahuudda la deegaameeyay iyo Falastiiniyiinta meel u dhow tuulada Tal, Dagaalkaas waxaa ku dhintay afar Falastiiniyiin ah iyo laba Israa’iiliyiin ah.

    Labada dhinacba waxay isku eedeeyeen in ay hurinayaan rabshadaha. Iska hor’imaadyadan ayaa kaga sii daray xiisadda ka taagan Daanta Galbeed, halkaas oo ay kordheen weerarrada ay Yahuud xagjir ah ku hayaan Falastiiniyiinta, kuwaas oo la sheegay in ay dhiirrigelin ka helayaan kooxo midigta fog ah oo ka tirsan dowladda Israa’iil ee hadda jirta.

    Wararka ka imanaya dhinaca Falastiiniyiinta ayaa sheegaya in Yahuudda dhulka la dajiyay ay weerareen laba tuulo oo ku yaalla Daanta Galbeed. Baabuur ayaa la burburiyay, hanti ayaa la dhacay, waxaana darbiyada lagu qoray qoraallo naceyb xanbaarsan.

    Duqa magaalada Qusra ayaa sheegay in Yahuudda u ay dab qabadsiiyeen masaajid weli dhismihiisu socday.

    Milatariga Israa’iil ayaa sheegay in ciidamo loo diray Qusra, islamarkaana booliisku ay sameyn doonaan baaritaan lagu ururin doono caddeymaha.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    "Iiraan waxay ku soo duushay Ingiriiska, balse Burnham weli ma oga." - maqaal uu daabacay The Telegraph

  2. Iran iyo Maraykanka oo sheegay 'in ay dib u bilaabayaan wadahadalada'

    Wakaaladda Wararka ee Anadolu ayaa, iyadoo soo xiganaysa ilo ka tirsan dowladda Pakistan, sheegtay in Mareykanka iyo Iiraan ay ka jawaabeen soo-jeedin wadajir ah oo ka timid Islamabad iyo Doha oo ku saabsan soo afjaridda dagaalka.

    Iyagoon bixin faahfaahin ku saabsan jawaabaha ka yimid Tehran iyo Washington, ilahaas ayaa sheegay in labada dhinac ay ku heshiiyeen wadahadal iyo diblomaasiyad lagu soo afjarayo colaadda, isla markaana dib loogu noqonayo miiska wadahadalka.

    Mas'uul xog-ogaal ah ayaa u sharraxay Wakaaladda Anadolu in Pakistan iyo Qatar ay maalmihii la soo dhaafay u gudbiyeen Iiraan iyo Mareykanka qorshe wadajir ah oo lagu yareynayo xiisadda; qorshahaas oo soo jeedinaya in labada dhinac, iyagoo qaadaya "tallaabada ugu horreysa," ay ku soo laabtaan xaaladdii ka horreysay markii uu dagaalku dib u qarxay 17 maalmood ka hor, ayna dib u billaabaan wadahadallada.

    Weerarradii Mareykanka iyo jawaabtii Iiraan ee ku aaddanayd ayaa istaagay laba maalmood ka hor.

    Dhowr warbaahinta Mareykanka ah ayaa soo weriyay in Donald Trump uu go'aansaday inuusan sii xoojin doonin weerarrada milateri ee ka dhanka ah Iiraan—ugu yaraan xilligan—iyadoo dhanka kalena milateriga Iiraan ay xaqiijiyeen in ciidamada Jamhuuriyadda Islaamiga ah ay joojiyeen weerarradooda, maadaama istiraatiijiyadda Iiraan ee xilligan dagaalka ay ahayd mid ku salaysan "aargoosi."

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  3. Xuutiyiinta oo sheegay in ay soo rideen daroon lagu sameeyay Turkiga oo Sacuudigu isticmaalayay

    Yahya Saree, oo ah afhayeenka xoogaga Xuutiyiinta Yemen, ayaa ku qoray bogga X in diyaarad nooca aan duuliyaha lahayn ee loo yaqaan 'bayraktar akıncı' oo ah nooca sahanka ee Turkiga, taasoo ay ciidamada Sucuudigu u adeegsadeen "hawlgallada cadawga ee hawada gobolka Al-Jawf" lagu soo riday "hub ku habboon".

    Bayaanka ayaa lagu sheegay in Xuuthiyiinta ay ka jawaabi doonaan cid kasta oo ku xad gudubta madax banaanida, awoodna ay u leeyihiin.

    Xuutiyiinta Yemen ayaa shalay sheegay inay duqeymo cirka ah la beegsadeen xarumaha Shidaalka ee Aramco iyo halka laga soo saaro Shidaalka Yanbu ee dalka Sacuudiga.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  4. Xuduudda Ciraaq iyo Kuwait oo dib loo furay

    Hay'adda Maamulka Xuduudaha ee Ciraaq ayaa ku dhawaaqday in dib loo furay marinka xuduudeedka ugu weyn ee ay la wadaagto Kuwait.

    Marinka Abdali ayaa la xiray ka dib markii Khamiistii lagu qaaday weerar loo adeegsaday diyaaradaha aan duuliyaha lahayn (drone).

    Weerarradan ayaa sababay khasaare hantiyeed.

    Aagga Abdali ee Gobolka Jahra, oo ku yaalla waqooyiga Kuwait, ayaa ka mid ah waddooyinka muhiimka ah ee isu-socodka rakaabka iyo gaadiidka ganacsiga ee u dhexeeya Ciraaq iyo Kuwait.

    Ma cadda cidda ka dambeysay weerarradaas.

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  5. Aqalka Cad: Wali ikhtiyaaro badan oo Iran la xiriira ayaa miiska noo saaran

    Ka dib markii warbaahinta Mareykanka ay baahisay in Donald Trump uu ka gaabsaday inuu sii xoojiyo hawlgallada milateri ee ka dhanka ah Iran xilligan, Aqalka Cad ayaa hoosta ka xariiqay in "dhammaan fursada" la xiriira Iran ay weli miiska saaran yihiin.

    "Madaxweynuhu mar walba wuxuu sheegaa inuu doorbidayo xal diblomaasiyadeed, laakiin haddii Iran ay sii waddo falalka argagixisanimo ee ka dhacaya marinka Hormuz ama kuwa ka dhanka ah xulafadeenna, [Donald Trump] weli dhammaan dookhyadiisa way u furan yihiin," ayuu yiri agaasimaha isgaarsiinta Aqalka Cad, Steven Chung, oo la hadlayay Fox News.

    Mr. Chung ayaa intaas ku daray: "Ka dib cunaqabatayn guulaysatay oo curyaamisay dhaqaalaha Iran iyo 13 maalmood oo xiriir ah oo lagu qaadayay weerarro ka dhan ah bartilmaameedyada milateri [ee Iran] iyadoo laga jawaabayo falalka cadawtinimo ee soo noqnoqday, waxaa Iran u haboon inay heshiis gasho, haddii kale way og yihiin waxa dhici doona."

    Wargeysyada New York Times, Axios, CNN, iyo wakaaladda Associated Press ayaa soo weriyay in Donald Trump uu go’aansaday inuusan sii xoojin duqeymaha milateri ee Mareykanka uu ku hayo Iran, ugu yaraan xilligan.

    Sida ay sheegeen warbaahintan, go’aankan ayaa la qaatay maalintii Jimcaha ka dib markii saraakiishu ay walaac ka muujiyeen hoos u dhaca ku yimid kaydka gantaallada difaaca ee Patriot iyo suurtagalnimada in laga fogaado xulafada Carabta ee Mareykanka ku leeyahay Gacanka Persian-ka.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  6. Warbaahinta Mareykanka: Trump ayaa joojiyay sii xoojinta weerarrada ka dhanka ah Iran.

    Warbaahinta kala ah The New York Times, Axios, CNN, iyo Associated Press ayaa soo weriyay in Donald Trump uu go’aansaday inuusan sii xoojin weerarrada milateri ee Mareykanka uu ku hayo Iran, ugu yaraan xilligan la joogo.

    Sida ay sheegeen warbaahintan, go’aankan ayaa la qaatay maalintii Jimcaha ka dib markii saraakiishu ay walaac ka muujiyeen hoos u dhaca ku yimid kaydka gantaallada difaaca ee Patriot iyo suurtagalnimada in xulafada Carabta ee Mareykanka ee ku yaalla Gacanka Carabta ay ka fogaadaan mowqifka Mareykanka.

    Aqalka Cad weli si rasmi ah uma xaqiijin wararkaas, balse wuxuu sheegay in Mr. Trump uu mar walba doorbido xal diblomaasiyadeed.

    Habeenkii Jimcaha ayaa ahaa habeenkii ugu horreeyay muddo ku dhow laba toddobaad oo uusan Mareykanku qaadin weerar xagga cirka ah oo lagu beegsanayo Iran, sidoo kalena lama soo werin wax weerar ah habeenkii Sabtida.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  7. Dhulgariir cabirkiisu yahay 6.4 oo ku dhuftay Iran

    Xarunta Cilmi-baarista Dhulgariirrada ee Iran ayaa shaacisay in subaxnimadii Axadda uu dhulgariir cabbirkiisu yahay 6.4 uu ka dhacay meel u dhow Bardsir oo ka tirsan Gobolka Kerman.

    Dhulgariirka ayaa la diiwaangeliyay saacaddu markay ahayd 3:46-kii subaxnimo, wuxuuna ka dhacay qoto dhan 10 kiiloomitir ah.

    Xuddunta dhulgariirka ayaa ahayd meel u dhow Bardsir, taas oo u jirta 22 kiiloomitir magaalada Negar, 36 kiiloomitirna u jirta magaalada Baghin.

    Agaasimaha Guud ee Maareynta Xaaladaha Degdegga ah ee Gobolka Kerman ayaa sheegay in dhulgariirkani uusan geysan wax khasaare nafeed ama mid hantiyeed ah.

    Halkan kasii Akhri warar dheeraad ah:

    Trump issues a different statement on Iran and the latest news on the Middle East crisis

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  8. War cusub oo ka soo kordhay weerarkii Berlin iyo magaca tumnaha oo la shaaciyey

    Booliiska Berlin ayaa shaaciyay in tuhmanaha lagu magacaabo Abdul B., oo ah nin 21 jir ah oo caato ah lehna timo madow. Waxay sheegeen inuu xirnaa funaanad madow oo koofiyad leh iyo surwaal cad.

    Sida lagu sheegay bayaanka booliiska, waxaa lagu tuhunsan yahay inuu dhaawacay dhowr qof oo ku sugnaa deegaanka Tiergarten, isla markaana uu weli baxsad yahay.

    Booliisku waxay intaas ku dareen:

    "Waxaa la rumeysan yahay in hal ama in ka badan oo qof ay ka carareen gaariga kadib dhacdada."

    Waxay sidoo kale sheegeen: "Waxaa intaa dheer, waxaa la soo sheegay in dhowr qof lagu dhaawacay hub af leh."

    Halkan kasii Akhri warar dheeraad ah:

    Trump issues a different statement on Iran and the latest news on the Middle East crisis

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

  9. Waxa booliisku ka sheegeen tuhmanaha weerarka Berlin

    Bayaan ay ku daabaceen baraha bulshada saacaddu markay ahayd 06:58, Booliiska Berlin ayaa sheegay inay aqoonsadeen tuhmane lab ah oo hore ay u yaqaaneen.

    Waxay sheegeen in ninkan uu xiriir la leeyahay fikirka xagjirka ah.

    Si kastaba ha ahaatee, booliisku wali ma aysan qaban tuhmanaha, mana aysan shaacin waxa uu ahaa ujeeddada ama sababta ka dambeysay weerarka. Waxay sidoo kale xaqiijiyeen in baadigoobka lagu raadinayo tuhmanaha uu weli socdo.

    Halkan kasii Akhri warar dheeraad ah:

    Trump issues a different statement on Iran and the latest news on the Middle East crisis

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    6 tababare oo shaqadooda waayay Koobka Adduunka ka dib

  10. Wararkii ugu dembeeyey ee gaari la jiirsiiyey dad ku sugnaa munaasabad magaalada Berlin ee dalka Jarmalka

    Hal qof ayaa ku dhintay, 16 kalena way ku dhaawacmeen kadib markii gaari lagu jiirsiiyay dad ku sugnaa munaasabadda Pride ee Berlin, sida ay booliisku sheegeen.

    • Gaari caddaan ah ayaa fiidnimadii Sabtida abbaaro 10:00 habeenimo (22:00 waqtiga maxalliga ah) lagu dhex waday dad isugu yimid munaasabadda Pride ee Berlin.
    • Hal qof ayaa dhintay, 16 kalena way ku dhaawacmeen dhacdada ka dhacday beerta Tiergarten.
    • Booliiska ayaa sheegay in gaarigu uu ahaa baabuur yar oo nooca minivan ama SUV-ga yar ah, waxaana laga helay isagoo laga tagay gudaha Tiergarten, halkaas oo uu u muuqday inuu geed ku dhacay, sida afhayeen u sheegay wakaaladda AFP.
    • Booliiska ayaa wada baadigoob xooggan oo ka socda guud ahaan Berlin, waxayna markhaatiyaasha ka codsadeen inay soo gudbiyaan sawirro ama muuqaallo ay ka hayaan dhacdada.
    • Aagga baaritaanka wuxuu ku fidsan yahay magaalada Berlin oo dhan, iyadoo kumannaan askari la geeyay, lana adeegsanayo diyaaradaha qumaatiga u kaca iyo kaamirooyinka
    • Booliisku waxay sheegeen inay aqoonsadeen tuhmane lab ah oo hore ay u yaqaaneen, isla markaana ay ku tilmaameen inuu xiriir la leeyahay fikirka xagjirka ah, hase yeeshee weli lama soo qaban.
    • Duqa magaalada Berlin, Kai Wegner, ayaa dhacdadan ku tilmaamay "weerar lagu qaaday bulshadeenna xorta ah ee furfuran."
    • Ra'iisul Wasaaraha Jarmalka, Friedrich Merz, ayaa ku tilmaamay "fal argagax leh", isagoo ballan qaaday in si buuxda loo baari doono dhacdada, lana ciqaabi doono cidda ka dambeysa.

    Waxa aan weli la ogeyn:

    • Sababta ama ujeeddada darawalka.
    • In tuhmanayaal kale ay ku lug lahaayeen iyo in kale.

    Sababta uu tuhmanuhu hore uga diiwaangashanaa booliiska.

    Halkan kasii Akhri warar dheeraad ah:

    Trump issues a different statement on Iran and the latest news on the Middle East crisis

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    6 tababare oo shaqadooda waayay Koobka Adduunka ka dib

  11. Xuutiyiinta ayaa bartilmaameedsaday xarumaha saliidda ee Sacuudiga ka dib markii Riyaad ay duqeymo ka fulisay Yemen

    Wasiirka Arrimaha Dibadda ee Iiraan Abbas Araqchi ayaa sheegay in "isku dhaca Yemen aan lagu xallin karin si militari," ka dib markii Xuutiyiinta Yemen ay sheegteen mas'uuliyadda weerar gantaal ah oo lagu qaaday Sacuudi Carabiya Sabtidii, iyagoo ka jawaabaya duqeymo ay boqortooyadu ku qaadday bartilmaameedyadooda, iyadoo ay sii kordhayaan baaxadda dagaalka Bariga Dhexe.

    "Waxaan aaminsanahay inaysan jirin xal militari oo loo heli karo arrimaha Yemen, Bab al-Mandab, iyo arrimaha kale ee gobolka," ayuu Araqchi ku yiri wareysi uu daabacay wargeyska dowladda ee Iran Sabtidii, isagoo ku baaqay "wadahadal" lagu xallinayo khilaafka.

    Wuxuu carabka ku adkeeyay in Iiraan aanay mas'uul ka ahayn xaaladda Yemen, isagoo tixgelinaya in weerarrada lagu arkay gobolka Bab al-Mandab "ay salka ku hayaan khilaafaadkii hore iyo arrimo u dhexeeyay Yemen, Sacuudi Carabiya iyo dalalka gobolka."

    Xuutiyiinta ayaa Sabtidii ku dhawaaqay inay bartilmaameedsadeen xarumaha shidaalka ee xeebta galbeed ee Sacuudi Carabiya oo kasoo horjeeda Badda Cas, iyadoo iskahorimaadka labada dhinac uu sii xoogeystay.

    Saacado ka dib markii Riyadh ay duqeymo cirka ah ku qaadday bartilmaameedyada Xuutiyiinta ee Hodeidah, afhayeenka militariga Xuutiyiinta, Yahya Saree, ayaa sheegay in "ciidamada qalabka sida ee Yemen ay qaadeen laba hawlgal oo militari oo tayo leh, kan ugu horreeya wuxuu bartilmaameedsaday bartilmaameedyo xasaasi ah oo xarumaha Aramco ee Jizan ah, iyadoo la adeegsanayo daraasiin gantaallo ballistic ah iyo diyaaradaha aan duuliyaha lahayn, halka howlgalka labaadna uu bartilmaameedsaday bartilmaameedyo xasaasi ah oo ay leedahay Aramco ee Yanbu."

    Halkan kasii Akhri warar dheeraad ah:

    Trump issues a different statement on Iran and the latest news on the Middle East crisis

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    6 tababare oo shaqadooda waayay Koobka Adduunka ka dib

  12. Shil gaari oo ka dhacay wadada Dimishiq-Deir ez-Zor iyo dad badan oo ku dhintay

    Soddon iyo shan qof ayaa ku dhintay, 30 kalena way ku dhaawacmeen shil gaari oo ka dhacay wadada Dimishiq-Deir ez-Zor, ee bariga Suuriya, Sabtidii.

    Shilka ayaa dhacay markii bas ay saarnaayeen xubno ka tirsan Ciidamada Amniga Gudaha uu ka dhacay bas kale oo siday dad rayid ah oo ku sugnaa agagaarka Al-Sukhnah iyo Palmyra oo ku yaal wadada Deir ez-Zor-Damascus, sida laga soo xigtay wakaaladda wararka ee rasmiga ah ee Suuriya (SANA).

    Wasaaradda Arrimaha Gudaha ee Suuriya ayaa sheegtay in kooxaha ambalaaska iyo hay'adaha ay khuseyso ay u carareen goobta shilku ka dhacay, halkaas oo ay sii wadeen qaadista dadka dhaawacmay iyo daadgureynta dadka ay dhibaatadu soo gaartay.

    Wasaaradda Gaashaandhigga ayaa dirtay tiro diyaarado helikobtaro ah si ay uga qayb qaataan daadgureynta caafimaad ee dhaawacyada iyo dhibanayaasha laga soo qaaday Garoonka Diyaaradaha Palmyra una qaaday Isbitaalka Ciidanka ee Homs, kooxo xiriir la leh Difaaca Madaniga ah ee Suuriya ayaa sidoo kale ka jawaabay dhacdada, sida laga soo xigtay SANA.

    Wasaaradda Caafimaadka ayaa xaqiijisay in isbitaallada ku yaal gobollada Deir ez-Zor iyo Homs la diyaariyey si loo soo dhaweeyo dadka dhaawaca ah, iyo in shaqaalaha caafimaadka iyo ambalaasta iyo dhammaan agabka daryeelka caafimaadka ee lagama maarmaanka ah la bixiyay.

    Wasiirka Arrimaha Gudaha Anas Khattab ayaa qoraal uu soo dhigay bogga X ku yiri: "Ma jiro wax ka xanuun badan in la waayo wiilal u socday inay gutaan waajibaadkooda, iyo in dad rayid ah oo aan waxba galabsan ay ka.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    6 tababare oo shaqadooda waayay Koobka Adduunka ka dib

  13. Ra'iisul Wasaaraha Spain oo ka digay 'saacadaha adag' ee soo socda iyadoo dabku uu barakiciyay 270,000

    Dab-damiyayaashu waxay la halgamayaan sidii ay u xakameyn lahaayeen dabka ka kacaya Faransiiska iyo Spain.

    "Waxaan ka fognahay in dabka la xakameeyo," ayuu yiri sarkaal maxalli ah oo Faransiis ah - fiiri meesha uu dabku ka gubanayo.

    Ku dhawaad ​​270,000 oo qof ayaa ku barakacay amarrada daadgureynta.

    Faransiiska, tobanaan kun ayaa laga daadgureeyay xaafadaha Bordeaux habeenkii xalay ahaa oo dhan, halka ku dhawaad ​​90,000 oo qof loo sheegay inay ka baxaan ama ay joogaan guryahooda Spain.

    Cimiladu waxay keeni kartaa xaalado ku habboon in dabku qabsado oo uu faafo, .

    Madaxweynaha gobolka Madrid Isabel Díaz Ayuso ayaa qoraal uu ku qoray X mar sii horeysay ku sheegay in gargaar loo heli karo daaweynta xoolaha uu dabku saameeyay, oo ay ku jiraan cuntada iyo daryeelka xoolaha.

    Xoolaha ayaa sidoo kale uu saameeyay, iyadoo muuqaal ay soo duubtay Reuters uu muujinayo dab-damiska militariga Spain oo lo' ka badbaadinaya dab ka kacay Madrid.

    Halkan kasii Akhri warar dheeraad ah:

    Trump: Madaxweynayaasha Ruushka iyo Shiinaha ayaa ii sheegay inaysan hub ka iibin doonin Iran

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay

    6 tababare oo shaqadooda waayay Koobka Adduunka ka dib

  14. Iiraan oo sheegtay inay iska difaaci doonto hanjabaadaha Maraykanka

    Iiraan ayaa sheegtay inay diyaar u tahay inay difaacdo danaheeda qaran iyo amnigeeda, iyadoo ka hortagaysa waxa ay ku tilmaantay hanjabaadaha Maraykanka. Waxay sidoo kale ku adkaysatay inaan loo adeegsan doonin Marinka Hormuz si loo wiiqo amniga dalka.

    "Waxaan difaaci doonnaa danaha shacabka Iiraan, waxaan ilaalin doonnaa xuquuqdooda, sidoo kalena waxaan difaaci doonnaa xuquuqda Iiraan ee Marinka Hormuz iyo Gacanka Faaris. Kuwani waa qayb ka mid ah mabaadi'dayada iyo yoolalkayaga, mana ka cabsanno cidna," ayuu yiri Wasiirka Arrimaha Dibadda ee Iiraan, Cabbaas Araghchi.

    Wuxuu intaa ku daray in Iiraan aysan ka tanaasuli doonin mowqifkeeda inta la ixtiraamayo danaha iyo xuquuqda muwaadiniinteeda, isagoo carrabka ku adkeeyay in dalkiisu sii wadi doono difaaca danihiisa qaran iyo amnigiisa marka uu wajaho hanjabaad kasta.

    Araghchi ayaa hadalkan ka jeediyay kulan uu la yeeshay dhiggiisa Ruushka, Sergei Lavrov, intii uu socday shirka Golaha Wasiirrada Arrimaha Dibadda ee Ururka Iskaashiga Shanghai (SCO) oo ka socda Kyrgyzstan.

    Sida ay warbaahinta Iiraan sheegtay, Araghchi ayaa sheegay in amni darrada hadda ka jirta Marinka Hormuz ay si toos ah uga dhalatay waxa uu ku eedeeyay Maraykanka inuu jebiyay ballanqaadyadiisii.

    Wuxuu sheegay in Iiraan ay muujisay muhiimadda diblomaasiyadda ee xalinta arrimaha caalamiga ah, balse isla markaana ay sii wadi doonto difaaca danaheeda iyo amniga qaranka iyadoo ka hortagaysa hanjabaad kasta.

    Dhanka kale, Araghchi ayaa sidoo kale wada-hadallo dhinaca taleefanka ah la yeeshay wasiirrada arrimaha dibadda ee Masar iyo Cumaan, kuwaas oo ay kaga wada hadleen arrimaha gobolka.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  15. Iran: Rasaasteena joogtada ah way sii socon doontaa ilaa cadowga si buuxda isu dhiibo

    Xoghayaha Golaha Sare ee Ammaanka Qaranka Iran ayaa sheegay in "rasaaseynta joogtada ah iyo beegsiga" ee Iran ay sii socon doonto ilaa "cadowga uu si buuxda isu dhiibo."

    Hadalka Mohammad Baqir Zulqadr ayaa imaanaya xili 24-kii saac ee lasoo dhaafay aan wax warbixin ah laga soo saarin weerarada Mareykanka iyo sida ay Iran uga jawaabtay.

    Xoghayaha Golaha Sare ee Amniga Qaranka Iran ayaa yiri, "Qiiq oo ka taluumaya meel kamid ah gobolka wuxuu ka dhigan yahay in militariga, amniga, ama xarun maliyadeed oo Mareykan ah la bartilmaameedsado."

    Mr. Zolqadr ayaa xilkan loogu magacaabay digreeto ka soo baxday Madaxweynaha Iran, kadib dilkii Cali Larijani, oo xilligaas ahaa Xoghayihii Golaha Sare ee Amniga Qaranka Iran, oo lagu dilay weerarrada Israel iyo Mareykanka.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  16. Xuutiyiinta Yeman oo ku dhawaaqay in ay beegsadeen xarumaha shirkadda Shidaalka ee Sacuudiga

    Xuutiyiinta Yemen oo taageero ka helaya Iran ayaa ku dhawaaqay inay beegsadeen xarumaha shirkadda Shidaalka ee Sacuudiga ee Aramco ee magaalooyinka Jizan iyo Yanbu.

    Yahya Saree, oo ah afhayeenka milatariga xuutiyiinta, ayaa bayaan uu soo saaray sabtidii ku sheegay in kooxda "ay fuliyeen hawlgalo ka dhan ah xarumaha Saudi Aramco ee Jizan iyo Yanbu."

    Sacuudiga ayaan weli ka hadlin arrintan.

    Xuutiyiinta ayaa dhowrkii maalmood ee la soo dhaafay weeraro ka dhan ah maraakiibta ka geystay Badda Cas, kadib markii ay ku dhawaaqeen cunaqabateynta ganacsiga badda ee ka dhanka ah Sacuudiga.

    Iyagoo ka jawaabaya go’doomintan dhanka badda ah, Sacuudi Carabiya ayaa beegsaday fariisimaha Xuutiyiinta ee magaalada dekedda leh ee Xudeydah ee Yemen, iyo sidoo kale jasiirad ku dhow.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  17. Zelensky: Waxaan beegsanay maraakiib Ruush ah oo Badda Caspian-ka ku daabulayay agab militari oo la xiriira Iran.

    Madaxweynaha Ukraine ayaa sheegay in ciidamada dalkiisu ay bartilmaameedsadeen maraakiib Ruushku leeyahay oo ku sugnaa Badda Caspian-ka, kuwaas oo sida agab militari oo la xiriira dalka Iran.

    Volodymyr Zelensky ayaa bartiisa X (oo hore loo oran jiray Twitter) ku qoray in markab dagaal oo Ruushku leeyahay sidoo kale la bartilmaameedsaday intii lagu guda jiray weerarradan masaafada dheer ee ka dhacay gobolka Badda Caspian-ka.

    Mr. Zelensky faahfaahin dheeraad ah kama bixin weerarradaas, balse wuxuu sheegay in ciidamada Ukraine ay sidoo kale bartilmaameedsadeen warshad ku taal magaalada Kirov ee dalka Ruushka, taas oo u jirta 1,200 oo kiiloomitir xadka u dhexeeya labada dal.

    Wuxuu sheegay in warshaddan ay "soo saarto qaybo ka mid ah hubka uu Ruushku u adeegsado dadkeenna."

    Sida uu sheegay Mr. Zelensky, weerarrada Ukraine waxaa sidoo kale lagu bartilmaameedsaday warshad sifeynta saliidda oo ku taal magaalada Tyumen, xarun saadka iyo maaraynta agabka oo ku taal Yekaterinburg, iyo goob lagu kaydiyo shidaalka oo ku taal Rostov-on-Don, kuwaas oo dhammaantood ku yaalla dalka Ruushka.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  18. Ururka Hawlaha Ganacsiga Badda ee Britain: Markab sida shidaal ayaa Jimcihii la kulmay ciidamo milateri oo ku sugnaa Badda Cumaan.

    Hay'adda Hawlgallada Ganacsiga Badda ee Ingiriiska ayaa sheegtay in markab shidaal qaada uu la kulmay "ciidamo milatari" Badda Cumaan Jimcihii, laakiin ma uusan faahfaahin nooca ciidamada.

    Hay'addan la xiriirta Ciidamada Badda ee Ingiriiska ayaa kula talisay maraakiibta inay ka feejignaadaan xaaladaha hawlgalka ee isbeddelaya iyagoo dib u eegaya macluumaadka ugu dambeeyay ee amniga badda.

    Saacado ka hor, militariga Mareykanka ayaa ku dhawaaqay weerar lagu qaaday markab shidaal qaada oo ku sugan Badda Cumaan, iyagoo sheegay in shaqaalaha markabka ay isku dayeen ugu yaraan afar jeer inay jebiyaan xayiraadda dekedaha Iiraan ka hor inta aan la bartilmaameedsan.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  19. Trump oo xaqiijiyay in Netanyahu uu imaanayo Washington maalinka Isniinta

    Madaxweynaha Mareykanka Donald Trump ayaa Jimcihii ku dhawaaqay in ra'iisul wasaaraha Israa'iil Benjamin Netanyahu uu booqan doono Mareykanka toddobaadka soo socda.

    Mr. Trump ayaa warkan ku dhawaaqay shalay khudbad uu ka jeediyay casho sharafta ururka saxafiyiinta ee Aqalka Cad.

    Xafiiska Ra'iisul Wasaaraha Israa'iil ayaa horay u shaaciyay in Mr. Netanyahu uu u safri doono Washington maalinta Isniinta ah, uuna la kulmi doono Donald Trump maalinta Talaadada ah.

    Xafiiska Mr. Netanyahu ayaa sidoo kale shaaca ka qaaday inuu ka qeyb galayo aaska marxuum Seneter Lindsey Graham.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'

  20. Araqchi oo u sheegay Lavrov: Amni-darrada ka jirta Marinka Hormuz waa natiijo toos ah oo ka dhalatay ballan-jabka Mareykanka.

    Warbaahinta Iran ayaa sheegtay in Wasiirka Arrimaha Dibadda ee Iran, Abbas Araghchi, uu la kulmay dhiggiisa Ruushka iyadoo uu socdo shirka Golaha Wasiirrada Arrimaha Dibadda ee waddamada xubnaha ka ah Ururka Iskaashiga Shanghai (SCO) oo ka dhacaya dalka Kyrgyzstan.

    Kulankan oo dhacay maalintii Jimcaha, ayuu Mr. Araghchi ku tilmaamay xaaladda amni-darro ee ka jirta Marinka Hormuz inay tahay "natiijo toos ah oo ka dhalatay jebinta ay Maraykanku jebiyeen ballan-qaadkoodii."

    Wuxuu yiri: "Jamhuuriyadda Islaamiga ah ee Iran, iyadoo muujisay sida ay uga dhabeyneyso dhanka diblomaasiyadda, waxay go'aansatay inay difaacdo danaha iyo amniga qarankeeda, isla markaana ay ka hortagto in Maraykanku uu si khaldan u adeegsado Marinka Hormuz si uu ugu hanjabo amniga qaranka Iran."

    Mr. Araghchi ayaa sidoo kale shalay khadka taleefanka kula hadlay wasiirrada arrimaha dibadda ee dalalka Masar iyo Cumaan.

    Si aad u akhrido sheekooyin badan:

    Iiraan: Waxaan burburinnay xarunta xogta ee Amazon ee Bahrain

    Faransiiska iyo Isbaayn oo ku jira xaalad degdeg ah

    Xiisad cusub iyo Bariga Dhexe: Xuutiyiinta oo sheegtay inay beegsadeen Sacuudiga

    'Carruurta Ghetto' ee Uganda ee la joogay Shakira Koobka Adduunka: 'Waayo-aragnimo noloshooda wax ka beddeshay'