وروستی, امریکا پر سعودي عربستان او کوېت د میلیاردونو ډالرو وسلې خرڅوي
د عکس سرچینه، Getty Images
د امریکا بهرنیو چارو وزارت ویلي چې د سعودي عربستان د هوايي دفاع د پیاوړتیا لپاره یې پر دغه هېواد د شاوخوا یو اعشاریه ۹۶ میلیارد ډالرو په ارزښت د وسلو په خرڅولو باندې هوکړه کړې ده.
دا داسې یو ګام دی چې په منځني ختيځ کې د تاوترېخوالي له زیاتېدو سره هممهاله اخیستل کېږي.
د امریکا بهرنیو چارو وزارت په یوه خبرپاڼه کې ویلي، "د [وسلو] دا خرڅون د امریکا د بهرنۍ تګلارې او ملي امنیت پر بنسټ د یو داسې مهم متحد د امنیت پیاوړتیا لپاره ترسره کېږي چې د ناټو غړی نه دی. سعودي عربستان په فارس خلیج کې د سیمې په سیاسي ثبات او اقتصادي پرمختګ کې مهم رول لوبوي".
د امریکا بهرنیو چارو وزارت همداراز ویلي چې د سعودي لپاره په دغه "وړاندیز شوې هوکړه" کې له هوا په هوا کې او له هوا پر ځمکې هدف وېشتونکې شاوخوا ۲۰ زره دانې رهبري کېدونکي "پرمختللې دقیقې وسلې"، لانچرونه، جنګي سرګلولې، اضافي پرزې او روزونه او نور لوژیستیکي ملاتړ شامل دی.
دغه وزارت همداراز کوېت ته د وسلو د ورکړې پر یوه جلا بسته تایید کړې چې په ترڅ کې به یې دغه هېواد ته د شاوخوا ۴۸۴ میلیون ډالرو په ارزښت د الوتکو تخنیکي مرسته برابرېږي.
په دې هوکړه کې له کوېت سره د سي-۱۷ نومي الوتکو په برخه کې تخنیکي مرسته او د هغوی اړوند تجهیزاتو ورکړه شامله ده چې پرزې، سافټوېرونه، د خوندیتوب خدمتونه، روزنه او لوژيستیکي ملاتړ هم پکې راځي.
پر دغو دواړو هېوادونو د وسلو د خرڅلاو دا پرېکړه به د امریکا د کانګرېس له بیا کتنې وروسته نهايي او پلې شي.
